Աշխատանքով իմաստավորված կանացի երջանկություն

Գարնանաբույր տոնը` մարտի 8-ը, արդեն երկրորդ տասնամյակն է, ինչ նորանկախ Հայաստանում տոնվում է մեկամսյա կտրվածքով. մինչև ապրիլի 7-ը` մայրության ու գեղեցկության տոնը: Սա ուրախալի և տրամաբանական է, քանզի կին արարածն առհասարակ և, մասնավորապես, հայ կինը կլոր տարին արժանի են սիրո, համայն ուշադրության, քնքշանքի, հոգատար վերաբերմունքի, որովհետև նա է  օջախի հենասյուներից մեկը:

Բելլա Էդվարդի Գրիգորյանը մեկն է այն միլիոնավոր հայ կանանցից, ով անձնական երջանկությունը երբեք չի զատում նախասիրած աշխատանքից, այն կոլեկտիվից, ուր յուրաքանչյուրն իր դերակատարությունն ունի նյարդաբան բժշկուհու յուրաքանչյուր օրն առավել իմաստալից, հետաքրքիր դարձնելու առումով:

Մինչ հայ բժիշկների բազմահազարանոց բանակը համալրելը, դպրոցի փայլուն շրջանավարտ դեռատի աղջնակը միայն մեկ երազանք է ունեցել` դառնալ բժշկուհի, կարողանալ ոտքի հանել հիվանդ, առողջական խնդիրներ ունեցող մարդկանց:

Երևանի պետական բժշկական ինստիտուտի երիտասարդ շրջանավարտը, ով արդեն անուն հանած նյարդաբանի համբավ ուներ, երջանիկ պատեհությամբ 1986-ին վերապատրաստվում է ԱՄՆ-ում և Եվրոպայում` ձեռք բերելով կլինիկական նեյրոֆիզիոլոգի հարակից մասնագիտություն:

1998-ին նա հաջողությամբ պաշտպանում է թեկնածուական ատենախոսությունը`«Կլինիկական նեյրոֆիզիոլոգիական կոլելյացիաները վետեբրոգեն կոպրեսիոն ռադիկուլոպաթիաների ժամանակ» թեմայով: Իսկ մեկ տարի անց նա աշխատանքի անցավ մայրաքաղաքի համալսարանական թիվ 1 հիվանդանոցի ռադիոլոգիայի կենտրոնում` հաջողությամբ համատեղելով նաև էլեկտրանեյրամիոգրաֆիստի աշխատանքը: Կլինիկայի ռադիոլոգիայի կենտրոնում նա իրականացնում է համակարգչային ախտորոշում, ինչը հնարավորություն է ընձեռում ըստ ամենայնի հետազոտել պացիենտների պերիֆերիկ նյարդերը, մկանները, որոշել վնասված նյարդերի տեսակն ու տեղը, վնասվածության աստիճանը, հիվանդության տեսակը` դրանով իսկ առաջարկելով բուժման արդյունավետ և ճշտագույն մարտավարություն:

Բժշկուհու կարծիքով, հատկապես, վերջին տասնամյակներում, ելնելով բնապահպանական անմխիթար իրավիճակներից, սթրեսներից, սննդի որակից և էլի մի շարք օբյեկտիվ հանգամանքներից, մարդկանց շրջանում ընդհանուր հիվանդացության աճ է արձանագրվել: Այդուհանդերձ, շնորհիվ բժշկական ապահովագրության համակարգի աստիճանական ներդրման, մարդիկ հասկացել են, որ ավելի լավ է ժամանակին հետազոտվել, ախտորոշվել, նոր միայն բուժվել: Հակառակ պարագայում` դրական արդյունքի մասին խոսք լինել չի կարող:

Ռադիոլոգիայի կենտրոնը, ինչպես հավաստիացնում է Բելլա Գրիգորյանը, ունի հետազոտման և ախտորոշման բոլոր միջոցները, ինչը հնարավորություն է ընձեռում նույն տեղում իրականացնել բազմապիսի հետազոտություններ, հատկապես, արդիական տեխնոլոգիաների և մասնագետ բժիշկների թիմի առկայության պայմաններում:

Բացի բժշկական ապահովագրություն ունեցողներից, անվճար հետազոտման իրավունք ունեն պետպատվերով կլինիկա ուղեգրված հիվանդները, համալսարանական կլինիկայի աշխատակիցներն ու նրանց առաջնային հարազատները: Նյարդաբանական ախտորոշումն ամենաարդյունավետն է:

Գիտությունը հսկայական առաջընթաց է արձանագրել: Այսօր բուժման կարիք ունեցող մարդն այլևս չի կարող հենվել բժշկի միակ եզրակացության վրա: Հատկապես, չարորակ ուռուցքային հիվանդություններն արդյունավետ բուժելու համար կարևոր են բժշկական երկու, հաճախ երեք եզրակացությունները:

«Յուրաքանչյուր  հիվանդ հնարավորություն է տալիս մի բան ավելի սովորել, չէ որ բժշկությունն այն մասնագիտությունն է, որ մինչև կյանքի վերջը սովորելու բան ունես»,- սա Բելլա Գրիգորյանի համոզմունքն է:

Այսօր այն բժշկի վարկանիշն է բարձր, ով մշտապես հետևում է համաշխարհային բժշկագիտության տեղեկատվությանը: Փառք Աստծո, համակարգչային տեխնիկան, Up to date համակարգը, ինտերնետի անսպառ հնարավորությունները և էլի նմանատիպ միջոցները բժշկին բժշկական ամենաառաջադիմական տեխնոլոգիաների հետ համընթաց քայլելու պատեհություն են ընձեռում:

Բելլա Գրիգորյանը ըստ արժանվույն է գնահատում ամերիկահայ բարերար Նազարյանների ընտանիքի (ընտանիքի ավագ որդին` Լևոնը ռադիոլոգ է) ներդրումը ոչ միայն ռադիոլոգիայի կենտրոնի շենքի կառուցման ֆինանսավորման, այլև արդիական սարքավորումներ ձեռք բերելու առումով: Պատահական չէ, որ Կենտրոնը տեխնոլոգիական իր հագեցվածությամբ լիովին համապատասխանում է ոչ միայն եվրոպական, այլև արևմտյան առաջադիմական երկրների չափանիշներին:

Իր աշխատանքին նվիրված և դրանով ապրող բժշկուհին բժշկագիտության ապագան շատ առումներով կապում է ապացուցողական բժշկության հետ, այն համարում կարևոր և անհրաժեշտ, ինչով առաջնորդվում են ԱՄՆ-ի, Իսրայելի, Արևմտյան Եվրոպայի մի շարք երկրներ:

Ուրախությամբ տեղեկանում ենք, որ բազմազբաղ բժշկուհին նաև Զալցբուրգի միջազգային բժշկական սեմինարների համակարգողն է Հայաստանում: Անցած մի քանի տարիների ընթացքում հայաստանյան ավելի քան 700 բժիշկներ մասնակցել են այդ սեմինարներին:

Բելլա Գրիգորյանը փաստում է, որ սատելիտային սիմպոզիումներ անցկացնելու նպատակով ԱՄՆ-ից, Արևմտյան Եվրոպայից հրավիրում են մասնագետներ, նրանց դասախոսություններն ու զեկուցումները մեր թե փորձառու, թե երիտասարդ բժիշկների համար հսկայական բժշկագիտական տեղեկատվություն են պարունակում: Սա նաև փորձի յուրօրինակ փոխանակում է:

«Մեծ երջանկություն է, հաճույք, որ մասնագիտական քո միջամտությամբ կարող ես օգնել ոչ միայն հիվանդ մարդկանց, այլև երիտասարդ, կարող բժիշկների, ովքեր ցանկանում են խորանալ ընտրած մասնագիտության բնագավառում, վերապատրաստվել եվրոպական առաջադիմական կլինիկաներում, մասնակցել սեմինարների և սիմոզիումների»,-ասում է տիկին Գրիգորյանը: 

Ընդունելով մեր շնորհավորանքները մարտի 8-ի տոնի առիթով, նա, իր հերթին շնորհավորեց Հայաստանի առողջապահության բնագավառի կին բժիշկներին, բուժքույրերին, բոլոր հայ կանանց ու աղջիկներին.«Կուզեի, որ մեր կանայք լինեն առողջ, չսպասեն այնքան, որ բժշկի դիմեն հիվանդության պարտադրանքով, ապրեն առողջ կենսակերպով, ժամանակ գտնեն զբաղվելու սպորտով, հնարավորինս շատ լինեն բնության գրկում, շաբաթվա գոնե մի քանի ժամը բացառապես նվիրեն իրենք իրենց, առողջ զավակներ մեծացնեն ու դաստիարակեն, բարությամբ, լավ տրամադրությամբ կարողանան ձերբազատվել ամենօրյա սթրեսներից, բացասական լիցքերից, ապրեն գարնանային օրվա զարթոնք ու ուրախ տրամադրություն արթնացնող զգացողությամբ...»

Հարցեր, պատասխաններ, մեկնաբանություններ